Panatilihin ang Asignaturang Filipino
ni
Yobhel Louisse P. Beltran
Central Luzon State University
September 28, 2018
Hindi lingid sa ating kaalaman na ang nais ng ating bansa ay makasabay sa
globalisasyon, sa gawing ito kamakailan lamang ay ipinatupad ang K-12 Curriculum
o ang Kinder to Grade 12 na nagkaroon ng karagdagang dalawang taon ng pag-aaral
sa hayskul. Kasunod nito ang pagpapatupad ng Commission on Higher Education
(CHED) ang CHED Memorandum Order No. 20 Series of 2013 (CHED Memo 20-
2013) o ang “General Education Curriculum: Holistic Understandings, Intellectual
and Civic Competencies”. Ayon sa nasabing kautusan magiging opsyon na lamang
ang pagtuturo ng Asignaturang Filipino sa pagtungtong ng kolehiyo.
Sa pagpapatupad ng nasabing kautusan marami ang tahasang tumutol, mga guro
at propesor ng Filipino at maging mga Unibersidad na ipinaglalaban ang karapatan ng
sariling atin. Ayon kay Zofia Leal ng Philippine Online Chronicle tumutol ang mga
propesor sa iba’t-ibang unibersidad kaya naman noong Hunyo 21, nagsama-sama ang
mahigit na 300 na propesor at mag-aaral mula sa 43 na Unibersidad at Kolehiyo para
itatag ang Alyansa ng mga Tagapagtanggol ng Wikang Filipino (Tanggol Wika). Ang
tanging panawagan nila ay ang panatilihin ang Wikang Filipino at nararapat itong
pagyabuhngin at hindi pabagsakin.
“Ang wika ay palatandaan ng identidad ng isang bayan at ang wikang ito ay
makatutulong ng malaki sa pagpapalalim ng pagmamahal sa bayan at
pagpapahalaga sa kasaysayan”, ani Bienvenido Lumbera na Propesor ng Wika at
Panitikan at Pabansang Alagad ng Pilipinas, Unibersidad ng Pilipinas Diliman.
Inihahayag ni Lumbera na ang wikang Filipino ay pagkakakilanlan ng bawat isa na
kahit saan mang sulok ng mundo tayo magtungo ay mananatili parin tayong Filipino
at dala natin ang wikang sariling atin.
